საიტი მუშაობს სატესტო რეჟიმში
სიახლეები
გარემოსდაცვითი ინფორმაციისა და განათლების ცენტრმა გორში კატასტროფების რისკის მართვის ტრენინგი გამართა
გარემოსდაცვითი ინფორმაციისა და განათლების ცენტრმა გორის კეთილდღეობისა და განვითარების ცენტრში ტრენინგი „კატასტროფების რისკის ინკლუზიური მართვა და შემცირება“ გამართა.
ტრენინგის ფარგლებში მონაწილეები გაეცნენ საქართველოსთვის დამახასიათებელ ძირითად საფრთხეებს, კატასტროფების გამომწვევ მიზეზებსა და რისკის მართვის ძირითად პრინციპებს. ასევე მიიღეს ინფორმაცია საგანგებო სიტუაციების დროს ქცევის წესებზე და განიხილეს ინდივიდუალურ და ჯგუფურ დონეზე მომზადების პრაქტიკული გზები.
პროგრამის მონაწილეებმა შეისწავლეს, როგორ მოახდინონ რისკების იდენტიფიცირება, დაგეგმონ პრევენციული და რეაგირების ნაბიჯები, ასევე კრიზისულ ვითარებაში იმოქმედონ დამოუკიდებლად და დაამყარონ ეფექტიანი კავშირი ადგილობრივ სერვისებთან.
ტრენინგი მიზნად ისახავს მონაწილეთა უსაფრთხოების დონის ამაღლებას, მოწყვლადობის შემცირებას და გრძელვადიან პერსპექტივაში საზოგადოების მდგრადობის გაძლიერებას კატასტროფების მიმართ. ამასთან, ის ემსახურება სხვადასხვა საჭიროების მქონე პირებისა და მათი პერსონალური ასისტენტების ინფორმირებულობის გაზრდას, მზადყოფნის გაძლიერებას და პრაქტიკული უნარების განვითარებას, რათა მათ საგანგებო სიტუაციებზე ეფექტიანი რეაგირება შეძლონ.
შეხვედრა პროექტის „კლიმატის ცვლილებით გამოწვეული კატასტროფების რისკის შემცირება საქართველოში” ფარგლებში გაიმართა.