კლიმატის ცვლილება თანამედროვე მსოფლიოს ერთ-ერთი უმნიშვნელოვანესი გამოწვევაა, რომელიც მნიშვნელოვან გავლენას ახდენს ადამიანებზე, ეკოსისტემებზე, ეკონომიკასა და მდგრადი განვითარების პროცესზე. გლობალური კლიმატის ცვლილება ზრდის ექსტრემალური ამინდისა და ბუნებრივი კატასტროფების სიხშირისა და ინტენსივობის რისკებს და განსაკუთრებით მნიშვნელოვან გამოწვევას წარმოადგენს აღნიშნული რისკებისადმი მოწყვლადი ქვეყნებისა და მოსახლეობისათვის. საქართველო, როგორც მთიანი ქვეყანა, განსაკუთრებით მოწყვლადია კლიმატის ცვლილების მიმართ. კლიმატის ცვლილების ზემოქმედება საქართველოში გამოიხატება, მათ შორის, გვალვების, წყალდიდობების, მეწყრების, ღვარცოფების, ზვავების, ძლიერი ქარების, სითბური ტალღებისა და სხვა ექსტრემალური მოვლენების რისკების ზრდით. კლიმატის ცვლილება ასევე გავლენას ახდენს წყლის რესურსებზე, სოფლის მეურნეობაზე, ტყეებსა და ბიომრავალფეროვნებაზე, ინფრასტრუქტურასა და ადამიანის ჯანმრთელობაზე. შავი ზღვის სანაპირო ზონაში კლიმატის ცვლილებასთან დაკავშირებული რისკები, მათ შორის სანაპირო ზოლის ეროზიისა და დატბორვის საფრთხეები, კიდევ უფრო ზრდის ადაპტაციის ღონისძიებების მნიშვნელობას. საქართველო არის გაეროს კლიმატის ცვლილების ჩარჩო კონვენციის (UNFCCC) მხარე და სრულად იზიარებს კონვენციის მიზნებსა და პრინციპებს. გარდა ამისა, საქართველომ მოახდინა პარიზის შეთანხმების რატიფიკაცია 2017 წლის 7 ივნისს. ამ შეთანხმებით საქართველომ აიღო ვალდებულება, არსებული შესაძლებლობებისა და ეროვნული გარემოებების გათვალისწინებით, თავისი წვლილი შეიტანოს გლობალური კლიმატის ცვლილების წინააღმდეგ მიმართულ ძალისხმევაში. კლიმატის ცვლილების წინააღმდეგ ეროვნული პოლიტიკის ერთ-ერთ მნიშვნელოვან საფუძველს წარმოადგენს მდგრადი განვითარების მიზანი 13 – „კლიმატის ცვლილების საწინააღმდეგო ქმედებები“, რომელიც საქართველოს ეროვნულ დონეზე პრიორიტეტულ მიმართულებებს შორისაა.